Achegamos aquí unha biografía cantada arredor da figura de Valentín Paz Andrade, a figura homenaxeada este ano nas Letras Galegas. Home comprometido, traballador, visionario, galeguista e ilustrado, soubo combinar pensamento e acción para facer de Galicia un lugar mellor en tempos moi difíciles para a liberdade e a xustiza. Docencia, estudo, avogacía, economía, xornalismo, poesía, ensaio político, ligado tamén ao mundo empresarial... A figura de Valentín Paz Andrade constitúe un exemplo senlleiro para toda a cidadanía e tamén para as nenas e nenos que nacen devagariño, ao mundo. A escola debe poñer en valor e dar a coñecer as figuras que se significaron en vida no eido da cultura(e non só), pois o descoñecemento só acostuma traer indiferenza e desprezo.
O canto é oralidade(nalgún lugar da Odisea, di Homero por Ulises que os deuses tecen desventuras para que as xeracións futuras non lles falten tristuras que cantar), o canto é lingua; vencellar a lingua a experiencias agradabeis debera conducir a unha actitude positiva cara o uso e o coñecemento da mesma.
O título da canción é unha homenaxe implícita aos oitenta e nove anos de vida de Valentín e tamén ao epitafio de Cunqueiro.
Talvez non sexa fútil lembrar o estribillo da mesma: "rapaces, mirade! Onde pode chegar...? Un pensamento con ganas de soñar..."
Nenas e nenos, no Recuncho dos Barrantiños tedes a vosa disposición as actividades que o Seminario Galán deseñou para aprender e disfrutar coa figura do Valentín. Premede aquí
Se no primeiro trimestre recibimos a visita do avó arxentino de Pedro, que emigrou a Galicia e se estableceu aquí e no segundo trimestre recibimos a visita de Camilo, o avó galego de Lucía, que emigrou ao Uruguay, hoxe recibimos a visita de Tania, a nai brasileira de Martín.Un apagón puxo en perigo a retransmisión en directo da visita, pero finalmente puidemos retransmitir a mesma xa iniciada. Aquí podedes escoitar a transmisión a través de Irradio Lingua:
Ordem e progresso(así reza a bandeira do Brasil), ou deberiamos dicir coñecemento e progreso, pois só con el se pode progresar. Tania realizou primeiramente unha exposición fotográfica, do seu arquivo persoal e dun libro moi especial do gran fotógrafo Sebastiao Salgado, mesturada con froitos característicos do Brasil, variedades de fariñas, e mesmo algúns boliños.
Pero o máis salientable aconteceu despois, cando xa co micrófono de Irradio Lingua nas mans comezou a falar do seu Brasil. Finalmente, Tania contoulles ás "meninas e meninos" un conto en portugués brasileiro: Pedro e as ferramentas.
A achega ao portugués a través do galego abre unha porta a unha comunidade de fala de máis de douscentos corenta millóns de persoas. Neste caso, é unha oportunidade do alumnado da escola de entrar en contacto con xente doutros lugares, doutras culturas. A competencia lingüística favorécese tamén acostumando o alumnado dende cativo a iniciar intercambios lingüísticos sinxelos con normas elementais de cortesía ou de escoita atenta respecto a persoas do seu entorno máis ou menos próximo: canto antes se inicie este camiño, antes se conquerirán as aprendizaxes que favorezan o seu acadamento. A escola debe fomentar este camiño: o intercambio de voces, e debe favorecerse cantas veces poida das experiencias de xente da contorna que conforma a comunidade educativa. (no caso de Tania, hai contidos para varias conversas) En homenaxe a ela e a súa xenerosidade, deixámosvos unha canción moi especial, que nos recomendou ela mesma cando xa se foran @s nen@s: Pra soletrar a liberdade. Esta canción está asociada ao Movemento dos Sem Terra, do que Tania formou parte durante moitos anos. Formou parte do mesmo nun dos episodios máis desgrazados da historia do mesmo, a Matanza de Eldorado de Carajás, na que a Policía Militar disparou contra a multitude que se manifestaba, suceso que recolle precisamente o libro de Sebastiao Salgado. A canción, aquí:
Tem que estar fora de moda criança fora da escola, pois há tempo
não vigora o direito de aprender
Criança e adolescente numa educação
decente pra um novo jeito de ser
pra soletrar a liberdade na cartilha do ABC.
Ter uma escola em cada canto do Brasil
com um novo jeito de educar pra ser feliz
Tem tanta gente sem direito de estudar
É o que nos mostra a realidade do país.
Juntar as forças, segurar de mão em mão,
numa corrente em prol da educação
Se o aprendizado for além do Be A Bá,
todo menino vai poder ser cidadão.
Alternativa pra empregar conhecimento
Movimento já mostrou para a nação
desafiando dentro dos assentamentos
Reforma Agrária também na Educação.
Para ouvir o todo o CD Arte em Movimento: http://www.landless-voices.org/vieira/archive-05.phtml?rd=ARTINMOV039&ng=...
O espazo de Rock&Lingua tenta vencellar música e galego co xogo de palabras: "&" significa and, que pode ser eou é, por tanto: rock e lingua, pero o rock é tamén lingua.
Observamos obviamente, que ao estar en Galicia non podemos deixar de lado as nosas tradicións musicais e o importante legado musical que posuímos. Así que parece lóxico abrir o espazo FolkÉlingua, Folk&Lingua.
Un dos obxectivos do proxecto é trascender as celebracións e incorporar de xeito progresivo prácticas que redunden no intercambio habitual entre alumnado e mestras/es de diferentes niveis, especialidades ou mesmo intencións e obxectivos, a priori diverxentes: en suma, modificar a práctica educativa. Tamén: percibir a escola como un lugar algo máis interconectado entre os seus membros e actividades no día a día. Isto supón trastornos: xente desprazándose a outras aulas, inseguridade que provoca un entorno cambiante, necesidade de flexibilizar as propostas(en canto a horario, en canto a espazos, en canto a número de participantes...) Pensamos que o importante é dar pasos nesa dirección, sumar colaboracións que se apropien do proceso(manexo da radio, das aplicacións tecnolóxicas...Que se poida percibir claramente que esas actividades son unha opción a incorporar ou afondar dentro da aula no día a día), e facer das propostas algo realmente vivo.
Nesta ocasión, o alumnado de 4º curso, da man de Mercedes, súa titora e María, a mestra de Música, gravaron a peza "Eu non sei" para incorporala ao arquivo de cortinas musicais de Irradio Lingua, momento que se recolle no vídeo.
Aquí, podedes escoitar o programa completo no que o alumnado nos explica algunha particularidade máis da música que interpretaron:
A intención do proxecto é favorecer tamén a interacción e participación dinámica entre o alumnado do centro. Nestes días, o alumnado do 4º curso protagonizou un programiña sobre Paz Andrade, ao que o alumnado de 2º asistiu como ouvinte, participando posteriormente na aprendizaxe da canción de homenaxe a Valentín Paz Andrade. A iniciación na figura de Paz Andrade aínda comezou nestes días, pero o alumnado de 4º foi desprendéndose da súa vergoña e temor ao micrófono para rematar facéndoo moi ben. Parabéns a tod@sel@s, e a Mercedes, a súa titora! A ver se se repite!
Aquí, os ollos de Paula, alumna de 2º, viaxan a través da videocámara, e decide dar unha volta pola aula para recoller parte da gravación do programa.
Finalmente, recibimos a visita de Torroncho Díaz(baixo) e Miguel Duarte(guitarra solista) do grupo Ruxe Ruxe. A expectación entre o alumnado superou as previsións e a retransmisión en directo da entrevista tamén.Para escoitala outra vez, clica aquí:
Malia algúns problemas técnicos, finalmente puido escoitarse e foi todo un éxito. O alumnado que non participou directamente na entrevista e, a través da canle interna de megafonía do centro e nalgúns ordenadores, non perdeu detalle das impresións dos músicos e das atinadas e incisivas preguntas das reporteiras e reporteiros de Irradio Lingua para a ocasión. Aquí vos achegamos un vídeo da entrevista na emisora e outro da actuación posterior. Graciñas aos Ruxe-Ruxe pola súa colaboración e a súa xenerosidade!!
A visita dalgúns dos compoñentes do grupo santiagués de rock Ruxe-Ruxe(son de Aríns!!)está a provocar grande expectación na nosa escola. Polo momento, deixamos uns vídeos de promoción, pois descubrimos que o grupo ten membros moito máis novos aínda. Alumn@s da escola faranlles unha entrevista radiofónica en directo a través de Irradio Lingua, e para iso toda a xente que queira escoitar a entrevista poderá facelo a través de www.spreaker.com/user/irradiolingua, este xoves a partires das doce menos cuarto(aproximadamente, pois a radio nin é ciencia nin é exacta)
Para ver algúns vídeos dos Ruxe-Ruxe e saber máis, non o pensedes, premede aquí:
Outra das actividades contidas no proxecto de Irradio Lingua é o Falador de Soños. Algo estimulante e que acostuma motivar o alumnado é o feito de poder expresar visións ou inquedanzas relacionadas coa súa experiencia. As visións oníricas, que Sócrates atribuía ao lume interior que se axitaba polos movementos da cabeza e a influenza das pálpebras, constitúen unha fonte de certo valor pedagóxico, pois ben aproveitadas poden constituír o punto de partida para construír un texto, unha historia e mesmo unha canción. Instalamos con dificuldade o Falador de Soños, coa porta que se converte en lingua, e iniciamos as gravacións. Iremos poñendo de paseniño os soños d@snos@s protagonistas e vendo en que deron. Aquí vos deixamos o primeiro feixe:
"Non hai mellor norma de comportamento que o coñecemento do pasado" Tácito
No primeiro trimestre recibimos na escola de Barrantes ao avó arxentino de Pedro acompañado da nai(súa filla) dun alumno do primeiro ciclo. Chegou cunha sorpresa: o Gaucho Barrales, un monicreque que fixo el mesmo, e co que nos explicou a súa vida na Arxentina e as circunstancias que lle fixeron percorrer máis de dez mil quilómetros e deixarArxentina para se instalar en Galicia.
Hai uns días recibimos a visita de Camilo, de setenta e catro anos, avó de Lucía, outra alumna do primeiro ciclo que nos fixo o relato da súa experiencia na emigración no Uruguay, en Montevideo, onde estivo a traballar dez anos para xuntar cartos e poder casar con Florinda, a avoa de Lucía. Contounos a súa viaxe en barco para cruzar o Atlántico, as súas viaxes en bici por todo Montevideo, e moitas cousas máis, antes de volver definitivamente a Barrantes.
A conexión entre Sudamérica e Galicia a través das experiencias dos maiores do alumnado debera permitir un maior coñecemento do entorno no que se está a desenvolver. A competencia lingüística inclúe non só o falar, senón saber que falar, como falar e cando, así como SABER ESCOITAR, para poder formular pensamentos e reflexións que lle axuden a nena e o neno a interactuar mellor . A competencia social e cidadá promóvese tamén a través do contacto interxeracional. O pasado danos pistas tamén do que permanece, daquelo que nos define como individuos e como sociedade...
Graciñas aos dous pola súa xenerosidade a a súa paciencia!!
Aquí vos achegamos un resumo do Entroido que vimos de celebrar na escola. Ademais de Irradio Lingua, polo cal nos disfrazamos de personaxes da literatura de Álvaro Cunqueiro, o alumnado tamén se disfrazou de obras de arte, árbores, fadas, xoaniñas...Mesturando elementos de Voz Natura e Cooperarte, os outros dous proxectos que articulan a actividade da escola. Este foi o resultado:
Aquí vos achegamos unha das propostas pacíficas que resoou na nosa escola o pasado mércores, unha espectacular montaxe musical de vídeo, protagonizada polo alumnado da escola, na celebración do Dia Internacional da Paz, cunha letra da que axiña se apropiaron as nenas e nenos da escola(e tamén @s mestr@s!) No blogue-recuncho dos Barrantiños www.recunchobarrantes.blogspot.com tedes máis iniciativas que se desenvolveron na escola neste día:
Parabens ás responsábeis da iniciativa, e ao alumnado da escola, deixándose pacíficamente a pel unha vez máis!
A continuación deixámosvos dúas pezas que non entraron no Volume I de Irradio Lingua porque se celebraron os dous últimos días do primeiro trimestre. Trátase da visita do Apalpador, coa que puideron disfrutar do grande tod@s @s nen@s da escola( e tamén o profesorado), e doutra banda o conto cantado titulado "Kandinsky e Cunqueiro no Foghete", do que vos deixamos a letra aquí:
Estaba o Kandinsky dentro dun bar en Barrantes,
era no Foguete nun bar daqueles de antes,
pintaba o Cunqueiro fumando dentro dun cadro,
logo o cadro ardía coa cinza daquel cigarro,
Sácame de aquí, non ves que me estou queimando?!
Toma un vaso de viño, eu só estaba pintando!
Cunqueiro non pode arder!!
Porque nós ímolo ler!!
Cunqueiro non pode arder, escoita Kandinsky deberialo saber!
Saíron os dous xuntos, fóra do Foguete,
e viron un corvo nun paraugas de xoguete,
a chuvia chegou e levounos o vento,
e dixo o Cunqueiro: son rei do meu pensamento!
Pepe de Cobián, dacabalo dun chimpín,
un elefante rosa voando onda min...
Moi grande é o mundo de dios!
E o corvo dixo: si, ho!!
Moi grande é o mundo de dios, pero todo colle na miña imaxinación!!
